अश्रुधारा उनिएको फाइल खोल्नु छ !

नगल्नू उतारचढावमा फोहोरी किरा बनेर
चम्कनू चमचम जीवनमा अमूल्य हिरा बनेर
समय शक्ति चिनेर रहनू समाजको मुटुमा
गर्नू प्रवाह रगतको धमनी शिरा बनेर ।

*******************************

हटोस् ग्रीष्म सुक्खा वायु जल धरामा परोस् बरु
पुष्प परागसेचनमा छलछल जरामा परोस् बरु
मिच्न सक्छ नगिँडेमा ढली आफैँ धोत्रे रुख
गिँडौँ भ्रष्ट गाँडे बहुदल खतरामा परोस् बरु।

*********************************

पानी चुहिने छानो फेर्न टाइल खोल्नु छ
अश्रुधारा उनिएको फाइल खोल्नु छ
राता सेता धमिराले सक्लान् ढुकुटी
फर्कौँ स्वदेश कसौँ मोर्चा मिसाइल खोल्नु छ।

********************************

उम्लिँदा बढ्यो आयतन धुलोमा पोखिएँ कतै
घट्यो कि त भन्दै वजन तुलोमा जोखिएँ कतै
बिटुलिएर छि: छि: दुरदुर हुँदै भागेका बेला
कालो कोटमा गन्दा छनछन चुलोमा चोखिएँ कतै।

भरत सिग्देल
नुवाकोट